मुक्तक

१

श्रृङ्गारमा गाजल टीका सिन्दुर चुरा पठाउने छु भन्छौ

के के माग्छौ माग्नु प्रिया हरेक कुरा पठाउने छु भन्छौ

प्रेम गर्छु तिमीलाई भन तिम्रो लागि जे पनि गर्छु भनेर

ए प्रियतम संसारका खुसी सबै पूरा पठाउने छु भन्छौ

२

जीवन जगतलाई बुझेर सरल बन्नुपर्छ

झुपडीमा पनि प्रेमको महल बन्नुपर्छ

उदाहरण रहोस् जीवन असल कर्मको,

फूल जस्तो कि सुन्दर कमल बन्नुपर्छ

३

घरिघरि किन ? प्रिय खबर पठाउछौ

सधैं गर्छु प्रेम भन्दै कदर पठाउछौ

खै कस्तो प्रेम हो ? बुझ्न सक्दिनँ म

प्रेम गर्ने बहानामा मफलर पठाउछौ

४

केवल तिमी नै हुनेछौ मेरो आँखाको नानीमा पनि

शालीनता सुन्दरता छ तिमीसँग आनीबानीमा पनि

हजारौं भिडमा पनि तिमीसँगै ठोकिँन जान्छ नजर,

आकर्षक छ तिम्रा बिचार हरेक कुराकानीमा पनि

५

परिश्रम मेहनतले जीवन फुल्न फल्न सक्नुपर्छ

गरेर असल कर्मले नै भाग्यलाई बदल्न सक्नुपर्छ

जस्तोसुकै परिस्थिति दु:खमा धैर्य बन्नुपर्छ साथी

दुनियाँ सामु मुस्कानले दु:ख पनि छल्न सक्नुपर्छ

६

तिम्रो सम्बन्धमा बाधक बन्न आउने छैन म साथी

तिम्रो लागि भनेर अब बिन्ती धाउने छैन म साथी

तिमीलाई प्रेम गरेको हो त्यसैले तिम्रो खुसी हेर्नुछ

तिम्रो दु:खमा दुख्ने छु कदापि रमाउने छैन म साथी