विश्वासघाती

आफ्नै आफन्त, इष्टमित्रले

विश्वास घात गरेपछि

एक्लो बनेको उसले

आफैलाई प्रश्न गर्यो

"आखिर विश्वास कसलाई गर्ने ?"

एक्कासी

छायाले भन्यो -

तँ जहाँ गए पनि

जस्तो अवस्थामा भए पनि

कहिल्यै छोड्ने छैन साथ तेरो।

एेनाले भन्यो -

तँ रुँदा सधैँ रोइदिनेछु

तँ हाँस्दा सधैँ हाँसिदिनेछु।

दुवैले जिन्दगीभर साथ दिने वाचा गरे

तर विश्वास लागेन उसलाई दुवैको

किनकि

अन्धकारमा एक्लो बनाउने छाया पनि त थियो

अनि

भित्री मन रुँदा उसको

नक्कली हासो हाँस्ने त्यही एेना थियो।

बुझिसकेको थियो उसले

विश्वासघाती त छाया र एेना पनि हुन् भन्ने।